இயேசு கிறிஸ்து இங்கே இப்படிச் சொல்கிறார்: “எனக்காக நீங்கள் செய்த ஊழியத்தின் வெற்றியை எண்ணி சந்தோஷப்படாதீர்கள். என்னோடு உங்களுக்கு இருக்கிற சரியான உறவை எண்ணி சந்தோஷப்படுங்கள்.” கிறிஸ்தவ ஊழியத்தில் நீங்கள் விழக்கூடிய ஒரு பொறி என்னவென்றால், ஊழியத்தின் வெற்றியைப் பார்த்து சந்தோஷப்படுவது. அதாவது, தேவன் உங்களைப் பயன்படுத்தினார் என்ற விஷயத்தை நினைத்து பெருமைப்படுவதுதான். ஆனால், இயேசு கிறிஸ்துவோடு நீங்கள் சரியான உறவில் இருந்தால், தேவன் உங்களைக் கொண்டு என்னென்ன செய்வார் என்பதை உங்களால் முழுமையாகக் கணிக்கவே முடியாது. நீங்கள் அவரோடு சரியான உறவை வைத்திருந்தால், உங்கள் சூழ்நிலைகள் எப்படி இருந்தாலும், நீங்கள் யாரைச் சந்தித்தாலும், அவர் தொடர்ந்து உங்களுக்குள் “ஜீவத்தண்ணீருள்ள நதிகளை” ஓடச் செய்வார் (யோவான் 7:38). இதைப் பற்றி உங்களுக்குத் தெரியப்படுத்தாமல் வைத்திருப்பது அவருடைய இரக்கம்தான். இரட்சிப்பும் பரிசுத்தமாக்குதலும் மூலமாக தேவனோடு சரியான உறவைப் பெற்ற பிறகு, எந்தச் சூழ்நிலையில் நீங்கள் இருந்தாலும், அதில் நீங்கள் தேவனால் வைக்கப்பட்டிருக்கிறீர்கள் என்பதை நினைவில் கொள்ளுங்கள். நீங்கள் தொடர்ந்து “அவர் ஒளியில் இருக்கிறார் போல ஒளியிலே நடக்கும்போது” (1 யோவான் 1:7), உங்கள் சூழ்நிலைகளுக்கு உங்கள் வாழ்க்கை எப்படி பதிலளிக்கிறது என்பதை வைத்து தேவன் அவருடைய நோக்கத்தை நிறைவேற்றுகிறார்.

இன்றைக்கு நம்முடைய போக்கு என்னவென்றால், ஊழியத்துக்குத்தான் அதிக முக்கியத்துவம் கொடுப்பது. ஒருவருடைய பயனை வைத்து உதவி கேட்கும் நபர்களிடம் கவனமாக இருங்கள். ஒருவருடைய பயனை வைத்துத்தான் எல்லாவற்றையும் அளவிட வேண்டும் என்றால், இயேசு கிறிஸ்துதான் இதுவரை வாழ்ந்தவர்களிலேயே மிகப்பெரிய தோல்வியுற்றவர் என்று சொல்ல வேண்டி வரும். ஒரு பரிசுத்தவானுக்கு தேவையான வழிநடத்துதலும் திசைகாட்டுதலும் தேவனிடமிருந்தே வருகிறது; அவருடைய பயனை வைத்து அல்ல. நாம் அவருக்காக என்ன செய்கிறோம் என்பது முக்கியமல்ல. நம் வழியாக தேவன் என்ன செய்கிறார் என்பதுதான் முக்கியம். ஒருவருடைய வாழ்க்கையில் நம்முடைய ஆண்டவர் கவனிக்கிற ஒரே விஷயம், அந்த நபர் தேவனோடு வைத்திருக்கிற உறவுதான். அது அவருடைய பிதாவுக்கு மிகுந்த மதிப்புள்ள ஒன்றாக இருக்கிறது. இயேசு “அநேகம் குமாரர்களை மகிமையிலே கொண்டு வருகிறார்…” (எபிரெயர் 2:10).

சங்கீதம் 129-131; 1 கொரிந்தியர் 11:1-16

ஆஸ்வால்டிலிருந்து ஞானம்

வயதாக ஆக நான் இன்னும் மேன்மையாகவும், சிறந்தவனாகவும், மற்றவர்களுக்கு உதவுகிறவனாகவும், தாழ்மையுள்ளவனாகவும் மாறுகிறேனா? இயேசுவோடு இருந்ததால் வருகிற வாழ்க்கையை மக்கள் கவனிக்கிற அளவுக்கு நான் வெளிப்படுத்துகிறேனா? இல்லையா, என் சொந்த வழியே நடக்கணும் என்று இன்னும் பிடிவாதமாகவும், இன்னும் திடமாகவும் ஆகிறேனா? உங்களுக்கு நீங்களே உண்மையைச் சொல்வது பெரிய விஷயம்.

உதவி கிடைக்கும் இடம்