ආත්මික අවබෝධය ලබාගැනීමේ රහස තියෙන්නේ අපේ බුද්ධිය නෙමෙයි; ඒක තියෙන්නේ කීකරුකමයි. මට විද්‍යාත්මක දැනුම ඕනේ නම්, මගේ බුද්ධිමය කුතුහලය තමයි මගේ මඟ පෙන්වන්නේ. හැබැයි යේසුස් ක්‍රිස්තුස්වහන්සේගේ ඉගැන්වීම් ගැන අවබෝධයක් ඕනේ නම්, ඒක ලැබෙන්නේ කීකරු වීමෙන් විතරයි. යේසුස්වහන්සේ උගන්වපු දේ මට අඳුරුයි නම්, මම කරන්න අකමැති යම් දෙයක් තියෙනවා කියලා මට තේරෙනවා. බුද්ධිමය අඳුරු බව එන්නේ නොදැනුවත්කමෙන්. ආත්මික අඳුරු බව එන්නේ මම කීකරු වෙන්න හිතාගෙන නැති දෙයක් තියෙන නිසයි.

දෙවියන්වහන්සේගෙන් පණිවිඩයක් ලැබෙන කෙනෙක්ට, ඒ මොහොතෙම පරීක්ෂාවක්ත් එනවා. අපි අකීකරු වෙලා ඒ පරීක්ෂාවෙන් වැටෙනවා. ඊට පස්සේ අපි ආත්මිකව ඉදිරියට යන්නේ නැත්තේ ඇයි කියලා පුදුම වෙනවා. “ඔබ ඔබේ පඬුර පූජාසනය ළඟට ගෙනා වෙලාවේ, ඔබේ සහෝදරයාට හෝ සහෝදරියට ඔබට විරුද්ධව යම් දෙයක් තියෙනවා කියලා මතක් වුණොත්, මුලින්ම ගිහින් ඔවුන් එක්ක සමාදාන වෙන්න” කියලා යේසුස්වහන්සේ කිව්වා (මතෙව් 5:23–24). අපේ ස්වාමීන්වහන්සේගේ ඉගැන්වීම් අපේ ජීවිතයටම හරියටම වැදෙනවා නේ. අපේ ව්‍යාජකම හෙළිවෙන්නේ නැතුව යේසුස්වහන්සේ ඉස්සරහා තත්පරයක්වත් ඉන්න අපිට බැහැ. උන්වහන්සේගේ ආත්මයාණන්වහන්සේ අපේ ඇතුළේ ඉන්න තමන්ම නිවැරදියි කියලා පෙන්වන්න හදන ආත්මය හෙළි කරනවා. උන්වහන්සේ අපව ඉතාම සියුම් දේවල් දක්වාම ඉගැන්වලා, මීට කලින් අපි කවදාවත් හිතලා නැති දේවල් ගැනත් අපව සංවේදී කරනවා.

යේසුස්වහන්සේ උන්වහන්සේගේ ඉගැන්වීම් තුළින් ඔබට යමක් හදවතටම දැනෙන්න සලස්වන්නෙ නම්, ඒක ලේසියට අතෑරලා දාන්න එපා. ඔබ එහෙම කළොත්, ඔබ ආගමික ව්‍යාජයෙක් වෙනවා. දැන් ඔබ අතෑරලා දාමින් ඉන්න දේවල් ගැන හිතලා බලන්න. එතකොට ඔබ ආත්මිකව ඉදිරියට යන්නේ නැත්තේ ඇයි කියලා තේරේවි. අනිත් අය ඔබට අන්තවාදියෙක් කියලා කිව්වත්, දෙවියන්වහන්සේ කියන දේට කීකරු වෙන්න. එතකොට ඔබ සොයන අවබෝධය ලැබේවි. දෙවියන්වහන්සේ යන්න කියද්දී, යන්න.

ගීතාවලිය 43-45; ක්‍රියා 27:27-44

ඔස්වල්ඩ්ගෙන් ලැබෙන ප්‍රඥාව

බයිබලය කියන්නේ නිකම්ම හිතට උණුසුම දෙන දෙයක් නෙමෙයි; ඒක ජීවනය දෙන දෙයක්. බයිබලය කියවන්න කාලය දෙන්න. එතකොට, ශරීරයට ලැබෙන නැවුම් වාතය වගේම, ඒකේ අලුත් කරන බලපෑමත් ඇත්තටම දැනෙයි. සැබෑ ගෝලයෝ, 387