මතෙව් 5:38-48 හි ස්වාමීන්වහන්සේ අපට දෙන අවවාදය තමයි, අපි හැමෝම එක්කම ගොඩක් ත්‍යාගශීලීව කටයුතු කරන්න ඕනේ කියන එක. ඔබේ ආත්මික ජීවිතයේදී ඔබේ ස්වාභාවික ඇල්මවල් සහ කැමැත්ත මත විතරක් පදනම් වෙලා ජීවත් වෙන්න එපා. හැම කෙනෙක්ටම ස්වාභාවික කැමති-අකමැති තියෙනවා නේ. අපි සමහර අයට කැමතියි, තවත් අයට කැමති නැහැ. ඒත් ඒ කැමැත්ත හෝ අකමැත්ත අපේ කිතුනු ජීවිතය පාලනය කරන්න කවදාවත් ඉඩ දෙන්න හොඳ නැහැ. “උන්වහන්සේ ආලෝකයේ සිටින්නාක් මෙන් අපිත් ආලෝකයේ ගමන් කරනවා නම්, අපට එකිනෙකා සමඟ සහභාගිකම තියෙනවා” (1 යොහන් 1:7). අපේ හිතේ විශේෂ කැමැත්තක් නැති අය එක්ක පවා අපිට ඒ සහභාගිකම තියෙන්න ඕනේ.

මෙතැනදී අපේ ස්වාමීන්වහන්සේ අපට දුන්න ආදර්ශය හොඳ මනුස්සයෙක්ගේවත්, හොඳ කිතුනුවෙක්ගේවත් ආදර්ශයක් නෙමෙයි, දෙවියන්වහන්සේගේම ආදර්ශයයි. “…ඔබගේ ස්වර්ගීය පියාණන්වහන්සේ පරිපූර්ණව සිටින්නාක් මෙන් ඔබත් පරිපූර්ණ වන්න.” තවත් විදිහකින් කිව්වොත්, දෙවියන්වහන්සේ ඔබට පෙන්නලා තියෙන දේම අනිත් අයටත් පෙන්නන්න. “ඔබගේ ස්වර්ගීය පියාණන්වහන්සේ පරිපූර්ණව සිටින්නාක් මෙන් ඔබත් පරිපූර්ණද” නැද්ද කියලා ඔප්පු කරන්න දෙවියන්වහන්සේ ඔබේ එදිනෙදා ජීවිතයේදී ඕනෑ තරම් අවස්ථාවන් දෙනවා. ගෝලයෙක් වෙනවා කියන්නේ අන් අය කෙරෙහි දෙවියන්වහන්සේට තියෙන උනන්දුවත් එක්ක දැනුවත්වම තමන්ව හඳුනාගන්න එකයි. යේසුස්වහන්සේ මෙහෙම කියනවා: “මම ඔබට අලුත් ආඥාවක් දෙමි, එනම් එකිනෙකාට ප්‍රේම කරන්න; මම ඔබට ප්‍රේම කළාක් මෙන් ඔබත් එකිනෙකාට ප්‍රේම කරන්න. ඔබ එකිනෙකාට ප්‍රේම කරනවා නම්, ඔබ මගේ ගෝලයන් බව සියල්ලන්ම දැනගනීවි” (යොහන් 13:34-35).

කිතුනු චරිතයක සැබෑ ප්‍රකාශනය තියෙන්නේ හොඳ වැඩ කිරීම ඇතුළේ නෙමෙයි, දෙවියන්වහන්සේගේ ස්වරූපයට සමාන වීම ඇතුළෙයි. දෙවියන්වහන්සේගේ ආත්මයාණන්වහන්සේ ඔබේ ඇතුළාන්තය වෙනස් කරලා තියෙනවා නම්, ඔබේ ජීවිතයෙන් පෙනෙන්නේ නිකම්ම හොඳ මනුෂ්‍ය ලක්ෂණ විතරක් නෙමෙයි, දේවික ලක්ෂණයි. අප තුළ තියෙන දෙවියන්වහන්සේගේ ජීවනය ප්‍රකාශ වෙන්නේ, දේවික වෙන්න උත්සාහ කරන මනුෂ්‍ය ජීවිතයක් විදිහට නෙමෙයි, දෙවියන්වහන්සේගේම ජීවනය විදිහටයි. කිතුනු ජීවිතයක තියෙන රහස තමයි, දෙවියන්වහන්සේගේ අනුග්‍රහය නිසා අතිස්වාභාවික දේ තමන් තුළ ස්වාභාවික දෙයක් බවට පත්වීමයි. මේ අත්දැකීම පැහැදිලිවම පෙනෙන්න පටන් ගන්නේ දෙවියන්වහන්සේ එක්ක ගත කරන සමීප වෙලාවල් වලදී නෙමෙයි, අපේ එදිනෙදා ප්‍රායෝගික ජීවිතයේ පුංචි පුංචි දේවල් ඇතුළෙයි. අපිට ව්‍යාකූල බවක් හෝ කලබලකාරී බවක් ඇති කරන දේවල් වලට මුහුණ දෙන්න සිද්ධ වුණත්, ඒ හැමදේම මැද පුදුමාකාර විදිහට නිශ්චලව සහ නොසැලී ඉන්න ශක්තිය අපිට තියෙනවා කියලා අපිම පුදුම වෙන විදිහට අපිට තේරෙයි.

දේශනාකාරයා 4-6; 2 කොරින්ති 12

ඔස්වල්ඩ්ගෙන් ප්‍රඥාවේ වචනයක්

ඔබ විශ්වාස කරන දේ මොකක්ද කියලා නැවත වතාවක් ඔබටම මතක් කරගන්න. ඊටපස්සේ හැකි තරම් ඒ දේවල් අයින් කරලා, ක්‍රිස්තුස්වහන්සේගේ කුරුසියේ පදනමටම ආපහු යන්න. – My Utmost for His Highest, නොවැම්බර් 25, 848 R