நான் அவரை வருத்தத்தோடு தவறாகப் புரிந்துகொண்ட போதா? (யோவான் 20:11-18 பாருங்கள்). உபதேசங்கள் எல்லாம் தெரிந்திருந்தாலும், இயேசுவை இன்னும் அறியாமல் இருக்க முடியும். உபதேச அறிவு இயேசுவை விட மேலே போய், அவரோடு நெருக்கமான உறவு இல்லாமல் இருந்தால், ஒருவருடைய ஆத்துமா பெரிய ஆபத்தில் இருக்கிறது. மரியாள் ஏன் அழுதாள்? அவளுடைய காலடியில் உள்ள புல்லை விட உபதேசங்களுக்கு அவள் மனதில் பெரிய இடம் இல்லை. சொல்லப்போனால், எந்த ஒரு பரிசேயனும் உபதேசங்களை வைத்து மரியாளை கேலிசெய்து முட்டாளாக்கியிருக்க முடியும். ஆனால், இயேசு அவளிடமிருந்து ஏழு பிசாசுகளைத் துரத்தினார் என்ற உண்மையை மட்டும் யாராலும் கேலிசெய்ய முடியாது (லூக்கா 8:2 பாருங்கள்). இருந்தாலும், இயேசுவையே அறிந்துகொள்வதோடு ஒப்பிடும்போது, அவருடைய ஆசீர்வாதங்கள் அவளுக்கு ஒன்றும் இல்லை. “…அவள் திரும்பிப் பார்த்தாள். இயேசு அங்கே நின்றுகொண்டிருந்தார். ஆனால், அது இயேசு என்று அவளுக்குத் தெரியவில்லை…. இயேசு அவளிடம், ‘மரியாளே!’ என்றார்” (யோவான் 20:14, 16). அவர் மரியாளின் பெயரைச் சொல்லி அழைத்ததும், தன்னிடம் பேசுவது யார் என்று அவளுக்கு உடனே புரிந்தது. அவளுக்கு அந்த நபரோடு தனிப்பட்ட வரலாறு இருக்கிறது என்பதை அவள் உணர்ந்தாள். “அவள் திரும்பி அவரிடம், ‘ரபூனி!’ என்றாள்” (யோவான் 20:16).

நான் பிடிவாதமாகச் சந்தேகப்பட்ட போதா? (யோவான் 20:24-29 பாருங்கள்). இயேசுவைப் பற்றிய ஏதாவது ஒரு விஷயத்தை நான் சந்தேகிக்கிறேனா? மற்றவர்கள் அனுபவித்துச் சொன்ன ஒரு காரியத்தை நான் இன்னும் அனுபவிக்காததால், அதைச் சந்தேகிக்கிறேனா? மற்ற சீஷர்கள் தோமாவிடம், “நாங்கள் ஆண்டவரைக் கண்டோம்” என்றார்கள் (யோவான் 20:25). ஆனால் தோமா, “நான் பார்க்காமல்… நம்பமாட்டேன்” என்று சந்தேகப்பட்டார் (யோவான் 20:25). தோமாவிற்கு இயேசுவின் தனிப்பட்ட தொடுதல் தேவைப்பட்டது. அவருடைய தொடுதல் எப்போது வரும் என்று நமக்குத் தெரியாது. ஆனால் அது வரும் போது, அது சொல்ல முடியாத அளவுக்கு விலைமதிப்பற்றது. “தோமா… அவரிடம், ‘என் ஆண்டவரும் என் தேவனும்!’ என்றார்” (யோவான் 20:28).

நான் சுயநலமாக அவரை மறுதலித்த போதா? (யோவான் 21:15-17 பாருங்கள்). பேதுரு இயேசு கிறிஸ்துவைச் சாபங்களோடும் ஆணைகளோடும் மறுதலித்தார் (மத்தேயு 26:69-75 பாருங்கள்). ஆனாலும், அவர் உயிர்த்தெழுந்த பிறகு இயேசு பேதுருவுக்கு மட்டும் தோன்றினார். இயேசு பேதுருவைத் தனிப்பட்ட முறையில் மீட்டார். பின்னர் மற்றவர்களின் முன்னிலையில் அவரை வெளிப்படையாகவும் மீட்டார். பேதுரு அவரிடம், “ஆண்டவரே… நான் உம்மிடம் அன்பாக இருக்கிறேன் என்பது உமக்குத் தெரியும்” என்றார் (யோவான் 21:17).

எனக்கு இயேசு கிறிஸ்துவோடு ஒரு தனிப்பட்ட வரலாறு இருக்கிறதா? சீஷத்துவத்தின் ஒரே உண்மையான அடையாளம் அவரோடு உள்ள நெருக்கமான ஒன்றுபாடுதான் — எதுவும் அசைக்க முடியாத அளவுக்கு இயேசுவைப் பற்றிய அறிவு.

சங்கீதம் 94-96; ரோமர் 15:14-33

ஆஸ்வால்டின் ஞானம்

ஒரு மனிதன் என்ன செய்கிறான் என்பது முக்கியமான இறுதி விஷயம் இல்லை. அவன் செய்கிற காரியங்களில் அவன் எப்படிப்பட்டவன் என்பதுதான் முக்கியம். ஒரு மனிதன் உருவாக்கும் சூழலே, அவன் செயல்விளைவுகளை விட அதிகமாக, நீண்டகால தாக்கத்தை ஏற்படுத்துகிறது. Baffled to Fight Better, 51 L