ආගමික ක්ෂේත්‍රයේ තියෙන ප්‍රධානම අදහස තමයි — මනුෂ්‍යයන් දිහා නෙමෙයි, දෙවියන්වහන්සේ දිහා ඔබේ දෑස් යොමු කරගෙන ඉන්න එක. යාච්ඤා කරන කෙනෙක් විදිහට අන් අය අතරේ ප්‍රසිද්ධ වෙන්න තියෙන ආසාව ඔබේ පෙළඹවීම වෙන්න හොඳ නැහැ. ඔබ යාච්ඤා කරන බව කාටවත් නොපෙනෙන, කිසිවෙක් නොදන්න ඇතුළු කාමරයක් හොයාගෙන, දොර වහල, රහසින් දෙවියන්වහන්සේ එක්ක කතා කරන්න. ස්වර්ගයේ සිටින ඔබේ පියාණන්වහන්සේව දැනගැනීම හැර වෙන කිසිම අරමුණක් ඔබට තියෙන්න එපා. රහස් යාච්ඤාව සඳහා වෙන් කරපු නිශ්චිත වේලාවන් නැතුව, ගෝලයෙක් විදිහට ජීවිතය ඉදිරියට ගෙනියන්න බැහැ.

“ඔබ යාච්ඤා කරන විට, හිස් වචන නැවත නැවත කියන්න එපා…” (මතෙව් 6:7). දෙවියන්වහන්සේ අපට සවන් දෙන්නේ අපි ගොඩක් උද්‍යෝගයෙන් යාච්ඤා කරන නිසා නෙමෙයි — උන්වහන්සේ අපට සවන් දෙන්නේ මුදවාගැනීම පදනම් කරගෙන විතරයි. අපේ උද්‍යෝගයෙන් දෙවියන්වහන්සේ කිසිවිටෙකත් පැහැදෙන්නේ නැහැ. යාච්ඤාව කියන්නේ දෙවියන්වහන්සේගෙන් දේවල් ලබාගන්න එක විතරක් නෙමෙයි — ඒක යාච්ඤාවේ මූලිකම අදියර විතරයි. යාච්ඤාව කියන්නේ දෙවියන්වහන්සේ එක්ක පරිපූර්ණ සහභාගිකමකට සහ එකතුකමකට එන එකයි. නැවත උත්පත්තිය තුළින් දෙවියන්වහන්සේගේ පුත්‍රයාණන් අප තුළ නිර්මාණය වෙලා තියෙනවා නම් (ගලාති 4:19 බලන්න), උන්වහන්සේ අපේ සාමාන්‍ය බුද්ධියටත් වඩා ඉදිරියට යමින්, අපි යාච්ඤා කරන දේවල් ගැන අපේ ආකල්පය වෙනස් කරනවා.

“ඉල්ලන සියල්ලන්ටම ලැබෙනවා…” (මතෙව් 7:8). අපි අපේ කැමැත්තවත් එකතු කරන්නේ නැතුව ආගමික නිරර්ථක දේවල් යාච්ඤා කරනවා. ඊටපස්සේ දෙවියන්වහන්සේ උත්තර දුන්නේ නැහැ කියනවා — නමුත් ඇත්තටම අපි කිසිම දෙයක් ඉල්ලලා නැහැ. යේසුස්වහන්සේ පැවසුවේ, “…ඔබ කැමති දෙයක් ඉල්ලන්න…” කියලායි (යොහන් 15:7). ඉල්ලීම කියන දේට අපේ කැමැත්ත සම්බන්ධ වෙන්නම ඕනේ. යේසුස්වහන්සේ යාච්ඤාව ගැන කතා කරපු හැම වෙලාවකම, උන්වහන්සේ කතා කළේ හරිම ලස්සන, කුඩා දරුවෙකුගේ වගේ සරලකමකිනුයි. ඒත් අපි අපේ විවේචනාත්මක ආකල්පයෙන්, “ඔව්, ඒත් යේසුස්වහන්සේ පවා කිව්වේ අපි ඉල්ලන්න ඕනේ කියලා නේ” කියලා උත්තර දෙනවා. නමුත් අපි දෙවියන්වහන්සේගෙන් ඉල්ලන්න ඕනේ යේසුස් ක්‍රිස්තුස්වහන්සේ අපට එළිදරව් කළ දෙවියන්වහන්සේට ගැළපෙන දේවල් විතරක් බව මතක තබාගන්න.

හිතෝපදේශ 25-26; 2 කොරින්ති 9

ඔස්වල්ඩ්ගෙන් ප්‍රඥාවේ වචනයක්

කිතුනුවෙක් තමන් ඉන්න දේව සැපයුම්කාරී වාතාවරණය දෙස බලද්දී ගන්න ඕනේ ආකල්පය තමයි, ඒ සෑම දෙයක් පිටුපසම දෙවියන්වහන්සේ උන්වහන්සේගේම අරමුණු වෙනුවෙන් ක්‍රියා කරනවා කියලා හඳුනාගැනීම. — බයිබලීය සදාචාරධර්ම (Biblical Ethics), 99 R