දෙවියන්වහන්සේට ඕනේ අපි යේසුස් ක්‍රිස්තුස්වහන්සේ තුළ සම්පූර්ණ ජීවිතයක් ගත කරනවා දකින්නයි. නමුත් සමහර වෙලාවට ඒ ජීවිතය පිටතින්ම පහර කනවා. එතකොට අපි ආයෙමත් ස්වයං-පරීක්ෂාවට වැටෙන්න පුරුදු වෙනවා. ඉවර වෙලා ගියා කියලා අපි හිතපු පුරුද්දක් තමයි ඒක. දෙවියන්වහන්සේ තුළ අපේ ජීවිතයේ සම්පූර්ණකම අවුල් කරන පළවෙනි දෙය ස්වයං-අවධානය තමයි. ඒ වගේම ඒක නිතරම අපේ ජීවිතවල අරගලයක් සහ කැළඹීමක් ඇති කරනවා. ස්වයං-අවධානය කියන්නේ පාපයක් නෙමෙයි. නොසන්සුන් හැඟීම් නිසා හරි, නැත්නම් එකපාරටම සම්පූර්ණයෙන්ම අලුත් තත්වයකට වැටුණාම හරි ඒක ඇති වෙන්න පුළුවන්. ඒත් අපි උන්වහන්සේ තුළ අතිශයින්ම සම්පූර්ණව ඉන්නවාට වඩා අඩුවෙන් ඉන්න එක කිසිසේත්ම දෙවියන්වහන්සේගේ කැමැත්ත නෙමෙයි. උන්වහන්සේ තුළ අපේ සහනය කැළඹෙන ඕනෑම දෙයක් එකපාරටම නිවැරදි කරගන්න ඕනේ. ඒක නොසලකා හැරලා නිවැරදි වෙන්නේ නැහැ. ඒකට කරන්න ඕනේ යේසුස් ක්‍රිස්තුස්වහන්සේ ළඟට එන එක විතරයි. අපි උන්වහන්සේ වෙතට ඇවිත්, අප තුළ ක්‍රිස්තුස්වහන්සේ කේන්ද්‍ර කරගත් අවධානයක් ඇති කරන්න කියලා ඉල්ලනවා නම්, අපි උන්වහන්සේ තුළ සම්පූර්ණයෙන්ම වාසය කරන්න ඉගෙන ගන්නකල් උන්වහන්සේ ඒ දේ නිතරම කරනවා.

ක්‍රිස්තුස්වහන්සේ එක්ක ඔබේ ජීවිතයේ එකමුතුකම බෙදලා දාන හරි විනාශ කරන හරි කිසිම දෙයක් මුහුණ දීලා බලන්නේ නැතුව ඔබේ ජීවිතේ තියාගන්න එපා. ඔබේ යාළුවන්ගේ බලපෑම හරි ඔබේ තත්වයන් හරි ඔබේ ජීවිතය බෙදලා දාන්න ඉඩ දෙන එක ගැන ප්‍රවේශම් වෙන්න. ඒකෙන් වෙන්නේ ඔබේ ශක්තිය අඩු වෙන එකයි, ඔබේ ආත්මික වර්ධනය මන්දගාමී වෙන එකයි. උන්වහන්සේගෙන් ඔබ වෙන් වෙලා ඉන්නවා කියලා ඔබටම පෙනෙන විදිහට, උන්වහන්සේ එක්ක තියෙන එකමුතුකම කඩලා දාන කිසිම දෙයකට ඉඩ දෙන්න එපා. ආත්මිකව නිවැරදිව ඉන්න එක තරම් වැදගත් දෙයක් තවත් නැහැ. ඒකට තියෙන එකම විසඳුම හරිම සරලයි— “මා වෙතට එන්න….” පුද්ගලයෙක් විදිහට අපේ බුද්ධිමය, සදාචාරාත්මක සහ ආත්මික ගැඹුර මේ වචනවලින් පරීක්ෂා කරලා මැන බලනවා. ඒත් අපේ ජීවිතයේ යම් පැත්තක අපි සැබෑ නැති බව පේනකොට, යේසුස්වහන්සේ ළඟට එනවා වෙනුවට අපි කරන්න කැමති ඒ තීරණයත් එක්ක වාද කරන එකයි.

ගීතාවලිය 103-104; 1 කොරින්ති 2

ඔස්වල්ඩ්ගෙන් ලැබෙන ප්‍රඥාව

ස්වාභාවිකව බැලුවොත්, දිරායෑමට වඩා ඉක්මනින් මිනිහෙක්ව අධෛර්යමත් කරන වෙන කිසිම දෙයක් නැහැ—ශරීරයේ ලස්සන, ස්වාභාවික ජීවිතය, මිත්‍රත්වය, සබඳතා මේ හැමදේම දිරායද්දී මනුෂ්‍යයෙක් අධෛර්යයට පත්වෙනවා. ඒත් පාවුලු කියන්නේ අපි යේසුස් ක්‍රිස්තුස්වහන්සේ කෙරෙහි විශ්වාසය තබනකොට මේ දේවල් නිසා අපි බිඳ වැටෙන්නේ නැහැ, ඒවා හරහා ආලෝකය එනවා කියලයි.
උපකාරයේ ස්ථානය