අපේ මිනුම්වලට අනුව අවධානය යොමු කරන්න වටින්නේ නැහැ කියලා හිතෙන දේවල් ගැනත් අලුත් ගිවිසුමේ සඳහන් වෙනවා. “ආත්මයෙන් දුප්පත් අය භාග්‍යවන්තයෝ….” මෙයින් වචනාර්ථයෙන්ම අදහස් වෙන්නේ, “දුප්පත් අසරණ අය භාග්‍යවන්තයෝ” කියන එකයි. අසරණ අය කියන්නේ ඇත්තටම හැමතැනම තියෙන සාමාන්‍ය දෙයක් නේ! අද දේශනා බොහෝ වෙලාවට කෙනෙකුගේ අධිෂ්ඨාන ශක්තිය හරි එයාගේ චරිතයේ ලස්සන හරි පෙන්වන්නයි උත්සාහ කරන්නේ. ඒවා ලේසියෙන්ම පෙනෙන දේවල්. “යේසුස් ක්‍රිස්තුස්වහන්සේ වෙනුවෙන් තීරණයක් ගන්න” කියලා අපි නිතරම අහන කතාවෙන් අවධාරණය කරන්නේ අපේ ස්වාමීන්වහන්සේ කවදාවත් විශ්වාසය නොතැබූ දෙයක්. උන්වහන්සේ අපෙන් කවදාවත් උන්වහන්සේ වෙනුවෙන් තීරණයක් ගන්න කියලා ඉල්ලන්නේ නැහැ. උන්වහන්සේට යටත් වෙන්න කියලයි ඉල්ලන්නේ. ඒකෙන් කියන්නේ ගොඩක් වෙනස් දෙයක්. යේසුස් ක්‍රිස්තුස්වහන්සේගේ රාජ්‍යයේ පදනම වෙන්නේ, සාමාන්‍ය මිනිසුන් තුළ තියෙන සැබෑ සුන්දරත්වයයි. මගේ අසරණකම මැද මම ඇත්තටම භාග්‍යවන්තයි. මට අධිෂ්ඨාන ශක්තියක් නැත්නම්, වටිනාකමක්වත් විශිෂ්ටත්වයක්වත් නැති ස්වභාවයක් තියෙනවා නම්, යේසුස්වහන්සේ මට මෙහෙම කියනවා: “ඔබ භාග්‍යවන්තයි. මොකද ඔබේ අසරණකම නිසාමයි ඔබට මගේ රාජ්‍යයට ඇතුල් වෙන්න පුළුවන් වෙන්නේ.” මගේ යහපත්කම නිසා මට උන්වහන්සේගේ රාජ්‍යයට ඇතුල් වෙන්න බැහැ. මට ඒකට ඇතුල් වෙන්න පුළුවන් වෙන්නේ සම්පූර්ණයෙන්ම දුප්පත් අසරණ කෙනෙක් විදිහට විතරයි.

දෙවියන්වහන්සේ වෙනුවෙන් කතා කරන ඒ ලස්සන ස්වභාවයේ සැබෑ ලක්ෂණය, ඒ ගුණය තමන් තුළ තියෙන කෙනාට සාමාන්‍යයෙන්ම දැනෙන්නේ නැහැ. තමන්ගේ බලපෑම ගැන දැනුවත්ව ඉන්න එක උඩඟුකමක් වගේම ක්‍රිස්තියානි නොවන දෙයක්. “මම දෙවියන්වහන්සේට ප්‍රයෝජනවත් වෙන්නේද කියලා” හිතන්න පටන් ගත්ත ගමන්ම, ස්වාමීන්වහන්සේගේ ස්පර්ශයේ ලස්සනත් නැවුම් බවත් මට අහිමි වෙනවා. “මා කෙරෙහි විශ්වාස කරන තැනැත්තාගේ… හදවතින් ජීවමාන ජලධාරා ගලා යනවා” (යොහන් 7:38). මම ඒ ගලා යන දේම පරීක්ෂා කරන්න ගියොත්, මට ස්වාමීන්වහන්සේගේ ස්පර්ශය නැති වෙනවා.

අපිට වැඩියෙන්ම බලපෑම් කරපු අය කවුද? අනිවාර්යයෙන්ම තමන් බලපෑම් කරනවා කියලා හිතපු අය නෙමෙයි. අපිට බලපෑම් කරනවා කියලා පොඩ්ඩක්වත් හිතුවේ නැති අය තමයි. කිතුනු ජීවිතයේදී, දේවභක්තික බලපෑමක් තියෙන කෙනා ඒ ගැන කවදාවත් දැනුවත්ව ඉන්නේ නැහැ. අපේ බලපෑම ගැන අපි දැනුවත්ව හිටියොත්, යේසුස්වහන්සේගේ ස්පර්ශයට ආවේණික සැබෑ සුන්දරත්වය ඒ වෙලාවෙම නැති වෙලා යනවා. යේසුස්වහන්සේ ක්‍රියා කරන වෙලාව අපි හැමවිටම දන්නවා. මොකද උන්වහන්සේ සාමාන්‍ය දේකින්ම පවා ආදර්ශවත්, දිරිගන්වනසුලු දෙයක් බිහි කරන නිසයි.

ගීතාවලිය 107-109; 1 කොරින්ති 4

ඔස්වල්ඩ්ගේ ප්‍රඥාවන්ත වදන්

ඇදහිල්ල වෙනුවෙන් පෙනී සිටින අයට, ස්වාමීන්වහන්සේගේ ආලෝකය තුළ ගමන් කරන්න ඉගෙනගන්නා තුරු තිත්තකම තිබෙනවා. නමුත් ස්වාමීන්වහන්සේගේ ආලෝකය තුළ ගමන් කරන්න ඉගෙනගත්තම, තිත්තකමත් වාදභේදත් ඇති වෙන්න බැහැ. බයිබලානුකූල මනෝවිද්‍යාව, 199 R