நம்முடைய அளவுகோல்களின்படி பார்த்தால், கவனிக்கத் தகுதியில்லாத விஷயங்கள் போல தோன்றும் சிலவற்றை புதிய ஏற்பாடு முக்கியமாகக் காட்டுகிறது. “ஆவியில் எளிமையானவர்கள் பாக்கியவான்கள்….” இதன் நேரடி அர்த்தம், “ஏழைகள் பாக்கியவான்கள்.” ஏழைகள் ரொம்பவே சாதாரணமானவங்க! இன்றைய பிரசங்கங்கள் பெரும்பாலும் ஒருவருடைய மன உறுதியை அல்லது அவருடைய குணத்தின் அழகைச் சுட்டிக்காட்ட விரும்புகின்றன. இவை எல்லாம் எளிதாகக் கவனிக்கப்படுகிற விஷயங்கள். “இயேசு கிறிஸ்துவுக்காக ஒரு தீர்மானம் எடுங்கள்” என்று நாம் அடிக்கடி கேட்கிற வார்த்தை, நம்முடைய ஆண்டவர் ஒருபோதும் நம்பாத ஒரு காரியத்தின் மீது கவனத்தை வைக்கிறது. அவர் அவருக்காக நாம் தீர்மானம் செய்யும்படி ஒருபோதும் கேட்கிறதில்லை. மாறாக, அவருக்கு நம்மை ஒப்புக்கொடுக்கத்தான் கேட்கிறார். இது முற்றிலும் வேறானது. இயேசு கிறிஸ்துவுடைய ராஜ்யத்தின் அடிப்படை, சாதாரணமானவர்களுடைய உண்மையான அழகுதான். என் வறுமையிலேயே நான் உண்மையிலேயே ஆசீர்வதிக்கப்பட்டவன். என்னிடம் மன உறுதியும் இல்லாமல், மதிப்போ சிறப்போ இல்லாத குணம்தான் இருக்கிறது என்றால், இயேசு என்னிடம், “நீ பாக்கியவான். ஏனென்றால் உன் வறுமையின் வழியாகத்தான் நீ என்னுடைய ராஜ்யத்திற்குள் நுழைய முடியும்” என்று சொல்கிறார். என்னுடைய நற்குணத்தின் அடிப்படையில் நான் அவருடைய ராஜ்யத்திற்குள் நுழைய முடியாது. நான் முழுமையாக ஒரு ஏழையாகத்தான் அதற்குள் நுழைய முடியும்.

தேவனுக்காகப் பேசுகிற அந்த அழகின் உண்மையான குணம், அதை வைத்திருக்கிறவருக்கே பெரும்பாலும் தெரியாது. நான் மற்றவர்களை பாதிக்கிறேன் என்று உணர்வோடு இருப்பது பெருமையானது. அது கிறிஸ்தவமானதும் இல்லை. நான் தேவனுக்குப் பயனுள்ளவனாக இருக்கிறேனா என்று யோசிக்க ஆரம்பித்தால், உடனே ஆண்டவருடைய தொடுதலின் அழகையும் புதுமையையும் இழந்துவிடுகிறேன். “என்னை விசுவாசிக்கிறவன்… அவன் இருதயத்திலிருந்து ஜீவனுள்ள தண்ணீருள்ள நதிகள் பாயும்” (யோவான் 7:38). அந்த நீர் எப்படி பாய்கிறது என்று நான் ஆராயத் தொடங்கினால், ஆண்டவருடைய தொடுதலை இழந்துவிடுகிறேன்.

நம்முடைய வாழ்க்கையில் அதிக தாக்கத்தை ஏற்படுத்தியவர்கள் யார்? நிச்சயமாக, தாங்கள்தான் நம்மை மாற்றினோம் என்று நினைத்தவர்கள் இல்லை. தங்களுக்கே தெரியாமல் நம்முடைய வாழ்க்கையில் தாக்கத்தை ஏற்படுத்தியவர்கள் தான் அவர்கள். கிறிஸ்தவ வாழ்க்கையில், தேவபக்தியுள்ள தாக்கம் தன்னைப்பற்றி ஒருபோதும் விழிப்புணர்வோடு இருப்பதில்லை. நம்முடைய தாக்கத்தை நாம் உணர ஆரம்பித்தால், இயேசுவுக்கே உரிய அந்த உண்மையான அழகு மறைந்துவிடுகிறது. இயேசு எப்போது கிரியை செய்கிறார் என்பதை நாம் எப்போதும் அறிந்துகொள்ளலாம். ஏனென்றால், அவர் சாதாரணமான விஷயங்களில்கூட ஊக்கமளிக்கிற ஒன்றை உருவாக்குகிறார்.

சங்கீதம் 107-109; 1 கொரிந்தியர் 4

ஞானம் – ஆஸ்வால்டு

விசுவாசத்தைக் காப்பவர்கள், கர்த்தருடைய வெளிச்சத்தில் நடக்கக் கற்றுக்கொள்ளும் வரைக்கும் கசப்பானவர்களாக இருக்க வாய்ப்புண்டு. நீங்கள் கர்த்தருடைய வெளிச்சத்தில் நடக்கக் கற்றுக்கொள்ளும்போது, கசப்பும் சண்டையும் இருக்கவே முடியாது. வேதாகம உளவியல், 199