இயேசு கிறிஸ்து நம்மை ஏதோ ஒரு காரியத்தைச் செய்யச் சொல்லி, அதற்கு நாம் கீழ்ப்படியும்போது, அவர் நம்மை பெரிய வெற்றிக்கு அழைத்துச் செல்வார் என்று நாம் நினைக்கிறோம். நம்முடைய கனவுகள்தான் தேவனுடைய நோக்கம் என்று நாம் ஒருபோதும் நினைக்கக்கூடாது. சொல்லப்போனால், அவருடைய நோக்கம் நாம் நினைப்பதற்கு அப்படியே நேர்மாறாகக்கூட இருக்கலாம். தேவன் நம்மை ஏதோ ஒரு குறிப்பிட்ட இலக்கை நோக்கித்தான் அழைத்துச் செல்கிறார் என்று நாம் நினைக்கிறோம். ஆனால் அது உண்மையல்ல. ஒரு குறிப்பிட்ட இலக்கை நாம் அடைகிறோமா இல்லையா என்பது பெரிய விஷயமே இல்லை. அந்த இலக்கை அடைவது என்பது பயணத்தின் ஒரு சிறு பகுதி மட்டும்தான். ஒரு இலக்கை அடைவதற்கான பாதையாக நாம் எதைப் பார்க்கிறோமோ, அதையே தேவன் இலக்காகவே பார்க்கிறார்.

எனக்கான தேவனுடைய நோக்கம் என்ன? அது எதுவாக இருந்தாலும், இப்பொழுதே நான் அவர்மீதும் அவருடைய வல்லமையின் மீதும் சார்ந்திருக்க வேண்டும் என்பதுதான் அவருடைய நோக்கம். வாழ்க்கையின் போராட்டங்களுக்கு நடுவிலும் நான் கலங்காமலும், உண்மையுள்ளவனாகவும், குழப்பம் இல்லாமலும் இருந்தால், தேவனுடைய நோக்கம் என்னுள் நிறைவேறிக்கொண்டிருக்கிறது என்று அர்த்தம். தேவன் ஏதோ ஒரு இறுதி இலக்கை நோக்கி வேலை செய்யவில்லை. அந்தப் பயணமே அவருடைய நோக்கம். நான் எதைப் பார்க்க வேண்டும் என்று அவர் விரும்புகிறார் என்றால், கரை தெரியாத, வெற்றியோ இலக்கோ கண்ணுக்குத் தெரியாத அந்தச் சூழ்நிலையிலும், “இயேசு கடலின் மீது நடந்து வருவதை”க் கண்டு, எல்லாம் சரியாகத்தான் இருக்கிறது என்ற உறுதியோடு நான் இருக்க வேண்டும் (மாற்கு 6:49). முடிவு முக்கியமல்ல. அந்தப் பயணம்தான் தேவனை மகிமைப்படுத்துகிறது.

தேவனுடைய பயிற்சி என்பது எதிர்காலத்திற்காக அல்ல, இப்பொழுதே நடப்பது. அவருடைய நோக்கம் ஏதோ ஒரு எதிர்காலத்திற்காக அல்ல, இந்த நிமிஷத்திற்காகவே இருக்கிறது. நம்முடைய கீழ்ப்படிதலுக்குப் பிறகு என்ன நடக்கும் என்பதில் நமக்கு எந்த வேலையும் இல்லை. அதைப்பற்றி கவலைப்படுவது தவறு. மக்கள் எதை “தயாரிப்பு” என்று சொல்கிறார்களோ, அதையே தேவன் “இலக்கு” என்று பார்க்கிறார்.

என் வாழ்க்கையின் புயல்களின் மீது தேவன் இப்போதே நடக்க முடியும் என்பதை நான் புரிந்துகொள்ள வேண்டும் என்பதே அவருடைய நோக்கம். நாம் எதிர்காலத்தைப் பற்றியே சிந்தித்துக் கொண்டிருந்தால், இப்போதைய நேரத்திற்கு நாம் போதிய முக்கியத்துவம் தருவதில்லை என்று அர்த்தம். ஆனால், அந்தந்த நிமிடம் நாம் கீழ்ப்படிவதே இலக்கு என்று உணர்ந்தால், ஒவ்வொரு நிமிஷமும் நமக்கு மிகவும் மதிப்புமிக்கதாக மாறிவிடும்.

சங்கீதம் 46-48; அப்போஸ்தலர் 28

ஆஸ்வால்டின் ஞானம்

நம்முடைய மனதில் இருக்கும் கேள்விகளுக்குப் பதில் கிடைப்பதன் மூலம் நாம் தேவனுடைய ராஜ்யத்திற்குள் நுழைவதில்லை; முழுமையான அர்ப்பணிப்பின் மூலமாக மட்டுமே நுழைய முடியும். உன்னதமான நன்மை—உமது மகத்தான மீட்பு, 565 R