බයිබලයේ සඳහන් වලාකුළු හැමවිටම දෙවියන්වහන්සේත් එක්ක සම්බන්ධයි. වලාකුළු කියන්නේ අපේ පෞද්ගලික ජීවිතේ ඇතුළෙත්, පිටතත් තියෙන දුක, පීඩා, නැත්නම් දෙවියන්වහන්සේගේ පාලනයට පටහැනි වගේ පෙනෙන දෙවියන්ගේ මෙහෙයවීමේ තත්වයන්. නමුත් දෙවියන්වහන්සේගේ ආත්මය අපිට ඇදහිල්ලෙන් ජීවත් වෙන්න උගන්වන්නේ මේ වලාකුළු හරහාම තමයි. අපේ ජීවිතේ කවදාවත් වලාකුළු නැත්නම්, අපිට ඇදහිල්ලක්ම නැහැ. “වලාකුළු උන්වහන්සේගේ පාදවල දූවිලිය” (නාහුම් 1:3). ඒක දෙවියන්වහන්සේ එතැන ඉන්නවා කියන ලකුණක්. දුක, වියෝව, දුක් වේදනා කියන්නේ ඇත්තටම දෙවියන්වහන්සේත් එක්කම එන වලාකුළු කියලා දැනගන්න එක කොයි තරම් නම් මහත් එළිදරව්වක්ද! වලාකුළු නැතුව දෙවියන්වහන්සේට අපි ළඟට එන්න බැහැ—උන්වහන්සේ එන්නේ පැහැදිලි, දීප්තිමත් ආලෝකයකින් නෙමෙයි.

අපේ පීඩා හරහා දෙවියන්වහන්සේ අපිට මොනවාහරි උගන්වන්න ඕනේ කියලා කියන එක හරි නෙමෙයි. උන්වහන්සේ අපේ පැත්තට එවන හැම වලාකුළක් හරහාම උන්වහන්සේට ඕනේ අපිට තිබ්බ සමහර දේවල් අමතක කරවන්න. වලාකුළ භාවිතා කරන්නේ උන්වහන්සේගේ අරමුණ තමයි අපේ විශ්වාසයන් සරල කරන එක. ඒකෙන් අන්තිමට අපි සහ උන්වහන්සේ අතර තියෙන සම්බන්ධය පොඩි දරුවෙක්ගේ එකක් වගේ, හරිම සරල එකක් වෙන්න ඕනේ. ඒක නම් දෙවියන්වහන්සේත් අපේ ආත්මයත් අතර විතරක් තියෙන සම්බන්ධයක්. අනිත් මිනිස්සු එතැනදී සෙවණැලි වගේ විතරයි. අනිත් අය අපිට සෙවණැලි වගේ පේන තැනට එනකල්, වලාකුළුයි අඳුරයි ඉඳහිටවත් අපේ ජීවිතේට එනවාමයි. දෙවියන්වහන්සේත් එක්ක තියෙන අපේ සම්බන්ධය මෙතෙක් කාලෙට වඩා දැන් සරල වෙලාද?

දෙවියන්වහන්සේ ඉඩ දෙන අමුතුම මෙහෙයවීම් සහ උන්වහන්සේ ගැන අපි දන්න දේ අතර සම්බන්ධයක් තියෙනවා. ඒ නිසා ජීවිතේ රහස් අපිට තේරෙන්නේ දෙවියන්වහන්සේ ගැන අපි දන්න දේේ ආලෝකයෙන්මයි කියලා ඉගෙන ගන්න ඕනේ. ජීවිතේ තියෙන ගැඹුරුම, අඳුරුම ඇත්තට මුහුණ දීලාත් දෙවියන්වහන්සේගේ ස්වභාවය ගැන අපේ දැක්මට හානියක් වෙන්නේ නැත්නම්, අපි තවමත් උන්වහන්සේව හරියටම දන්නේ නැහැ.

“…ඔවුන් වලාකුළට ඇතුල් වෙද්දී බය වුණා” (ලූක් 9:34). ඔබේ වලාකුළේ යේසුස්වහන්සේ ඇරෙන්න වෙන කවුරුහරි ඉන්නවද? එහෙම නම්, “තවත් කිසිවෙක් නැතිව, යේසුස්වහන්සේ විතරයි…” කියන තැනට ඔබ එනකල් ඒක තවත් අඳුරු වෙන්නම තමයි යන්නේ (මාර්ක් 9:8; 2–7 පදත් බලන්න).

ගීතාවලිය 49-50; රෝම 1

ඔස්වල්ඩ්ගෙන් ලැබෙන ප්‍රඥාව

ඇදහිල්ල වෙනුවෙන් පෙනී සිටින අය ස්වාමීන්වහන්සේගේ ආලෝකයේ ගමන් කරන්න ඉගෙන ගන්නා තුරු ටිකක් කටුක වෙනවා. නමුත් ස්වාමීන්වහන්සේගේ ආලෝකයේ ගමන් කරන්න ඉගෙන ගත්තම, කටුක බවත් වාද විවාදත් ඉතිරි වෙන්නේ නැහැ. බයිබලීය මනෝවිද්‍යාව, 199 R