நாம் இயேசு கிறிஸ்துவுக்குள் ஒரு முழுமையான வாழ்க்கையை வாழ வேண்டும் என்பதே தேவனுடைய விருப்பம். ஆனால் சில நேரங்களில் அந்த வாழ்க்கை வெளியில் இருந்து தாக்கப்படுகிறது. அப்போது, முடிந்துவிட்டது என்று நாம் நினைத்த சுயபரிசோதனை பழக்கத்திற்குள் மீண்டும் விழுந்துவிடுகிறோம். தேவனுக்குள் நம்முடைய வாழ்க்கையின் முழுமையை முதலில் கெடுப்பது சுய-விழிப்புணர்வே. அது நம்முடைய வாழ்க்கையில் தொடர்ந்து போராட்டமும் கலக்கமும் உண்டாக்குகிறது. சுய-விழிப்புணர்வு பாவம் அல்ல. பதற்றமான உணர்ச்சிகளாலோ, அல்லது திடீரென்று முற்றிலும் புதிய சூழ்நிலைகளுக்குள் நாம் தள்ளப்படுவதாலோ அது வரலாம். இருப்பினும், நாம் அவருக்குள் முற்றிலும் பரிபூரணமாக இல்லாமல் இருப்பதை தேவன் ஒருபோதும் விரும்புவதில்லை. அவருக்குள் நமக்கு இருக்கும் அமைதியைக் கெடுக்கும் எதுவாக இருந்தாலும், அதை உடனடியாகச் சரிசெய்ய வேண்டும். அதை உதாசீனப்படுத்துவதால் சரிசெய்ய முடியாது. இயேசு கிறிஸ்துவிடம் வருவதால் மட்டுமே அது சரியாகும். கிறிஸ்துவைப் பற்றிய விழிப்புணர்வை நமக்குள்ளே உண்டாக்கும்படி கேட்டு நாம் அவரிடம் வந்தால், நாம் அவருக்குள் முழுமையாக நிலைத்திருக்கக் கற்றுக்கொள்ளும் வரை, அவர் அதை எப்போதும் செய்வார்.

கிறிஸ்துவோடு உங்களுக்குள்ள ஒன்றிணைப்பைப் பிரிக்கிற அல்லது அழிக்கிற எதையும், அதை எதிர்கொள்ளாமல் உங்கள் வாழ்க்கையில் இருக்க அனுமதிக்காதீர்கள். உங்கள் நண்பர்களின் செல்வாக்கோ, உங்களுடைய சூழ்நிலைகளோ உங்கள் வாழ்க்கையைப் பிரிக்க அனுமதிக்காதபடி எச்சரிக்கையாக இருங்கள். இது உங்களுடைய பலத்தை உறிஞ்சி, உங்களுடைய ஆவிக்குரிய வளர்ச்சியைத் தாமதப்படுத்த மட்டுமே செய்யும். அவரோடு உங்களுக்குள்ள ஒன்றிணைப்பைப் பிரித்து, உங்களை அவரிடமிருந்து தனியாகப் பார்க்க வைக்கும் எதைக் குறித்தும் எச்சரிக்கையாக இருங்கள். ஆவிக்குரிய ரீதியில் சரியாக இருப்பதை விட முக்கியமானது வேறு எதுவுமில்லை. அதற்கான ஒரே தீர்வு மிக எளிமையானது— “என்னிடத்திற்கு வாருங்கள்….” என்பதுதான். ஒரு மனிதனாக நம்முடைய அறிவு, ஒழுக்கம், ஆவிக்குரிய ஆழம் ஆகியவை இந்த வார்த்தைகளால்தான் சோதிக்கப்பட்டு அளவிடப்படுகின்றன. ஆனாலும், நம் வாழ்க்கையின் எந்தெந்த விஷயங்களில் நாம் உண்மையாக இல்லையோ, அங்கெல்லாம் இயேசுவிடம் வருவதற்குப் பதிலாக, அதை நியாயப்படுத்தவே நாம் விரும்புகிறோம்.

சங்கீதம் 103-104; 1 கொரிந்தியர் 2

ஆஸ்வால்டின் ஞானம்

இயல்பாகப் பார்த்தால், நம்முடைய சரீர அழகு, இயற்கை வாழ்க்கை, நட்பு, உறவுகள் என்று எல்லாமே சிதைவடைவது போல நம்மை உடனே மனம் குனியச் செய்யும் விஷயம் வேறு எதுவும் இல்லை. இவை எல்லாமே ஒரு மனிதனைச் சோர்வடையச் செய்கின்றன. ஆனால், நாம் இயேசு கிறிஸ்துவை நம்பும்போது, இந்த விஷயங்கள் நம்மைச் சோர்வடையச் செய்வதில்லை. அவற்றின் வழியாகவே வெளிச்சம் வருகிறது என்று பவுல் சொல்கிறார்.
உதவி கிடைக்கும் இடம்