මිෂනාරිවරයෙක් කියන්නේ ශුද්ධාත්මයාණන්වහන්සේ විසින් “ඔබ අයිති ඔබටම නෙමෙයි” (1 කොරින්ති 6:19) කියන අවබෝධය ඇති කරලා තියෙන කෙනෙක්. “මම අයිති මටම නෙමෙයි” කියලා කියන්න පුළුවන් වෙන්නේ අපේ ආත්මික ජීවිතයේ ඉහළම තැනකට ආවමයි. එදිනෙදා ජීවිතයේ තියෙන අවුල් මැදත් ඒ ජීවිතයේ සැබෑ ස්වභාවය පේන්න තියෙන්නේ, ස්වෛරී තීරණයකින් අපවම වෙනත් කෙනෙකුට දැනුවත්වම භාර දෙන එකෙන් තමයි. ඒ තැනැත්තා තමයි යේසුස් ක්‍රිස්තුස්වහන්සේ. ශුද්ධාත්මයාණන්වහන්සේ යේසුස්වහන්සේගේ සැබෑ ස්වභාවය මට පැහැදිලි කරලා දෙන්නේ මාව මගේ ස්වාමීන්වහන්සේ එක්ක එකක් කරන්නයි, නිකම්ම උන්වහන්සේගේ ප්‍රදර්ශනයේ ජයග්‍රහණයක් වෙන්න නෙමෙයි. අපේ ස්වාමීන්වහන්සේ කවදාවත් තමන්ගේ ගෝලයෝ පිටත් කළේ උන්වහන්සේ ඔවුන් වෙනුවෙන් කරපු දේ පදනම් කරගෙන නෙමෙයි. උන්වහන්සේගේ උත්ථානයෙන් පස්සේ, ශුද්ධාත්මයාණන්වහන්සේගේ බලයෙන් යේසුස්වහන්සේ ඇත්තටම කවුද කියලා ගෝලයෝ වටහාගත්තට පස්සෙයි උන්වහන්සේ “යන්න” (මතෙව් 28:19; ලූක් 24:49 සහ ක්‍රියා 1:8 ද බලන්න) කියලා කිව්වේ.

“යමෙක් මා ළඟට ඇවිත් තමාගේ පියාටත් මවටත්, බිරිඳටත් දරුවන්ටත්, සහෝදරයන්ටත් සහෝදරියන්ටත්, එසේම තමාගේම ජීවිතයටත් වෛර නොකරන්නේ නම්, ඔහුට මගේ ගෝලයෙක් වෙන්න බැහැ” (ලූක් 14:26). උන්වහන්සේ මෙයින් කිව්වේ ඒ කෙනා හොඳ හෝ අවංක කෙනෙක් වෙන්න බැහැ කියන එක නෙමෙයි. උන්වහන්සේ කියන්න හැදුවේ, යේසුස්වහන්සේට “මේ කෙනා මගේ” කියලා ලියලා තබන්න බැරි කෙනෙක් වෙන්න බැහැ කියන එකයි. අපේ ස්වාමීන්වහන්සේ මේ පදයේ සඳහන් කරපු සම්බන්ධතා වලින් ඕනෑම එකක්, උන්වහන්සේ එක්ක අපිට තියෙන සම්බන්ධයට තරග කරන්න පුළුවන්. මම මගේ මවට, බිරිඳට, නැත්නම් මටම අයිති වෙන්න කැමති වෙන්න පුළුවන්. ඒත් එහෙම නම්, යේසුස්වහන්සේ කිව්වේ “ඔබට මගේ ගෝලයෙක් වෙන්න බැහැ” කියලයි. මේකෙන් අදහස් වෙන්නේ මට ගැළවීම ලැබෙන්නේ නැහැ කියන එක නෙමෙයි. හැබැයි මට සම්පූර්ණයෙන්ම උන්වහන්සේට අයිති වෙන්න බැහැ කියන එකයි.

අපේ ස්වාමීන්වහන්සේ තමන්ගේ ගෝලයාව උන්වහන්සේගේම සන්තකයක් කරගන්නවා. ඒ වගේම ඔහු වෙනුවෙන් සම්පූර්ණ වගකීමත් ගන්නවා. “…ඔබ සැම මට සාක්ෂිකරුවෝ වන්නහුය…” (ක්‍රියා 1:8). ගෝලයෙකුගේ ඇතුළේ ඇති වෙන ආශාව යේසුස්වහන්සේ වෙනුවෙන් මොනවා හරි කරන එක විතරක් නෙමෙයි. උන්වහන්සේට සම්පූර්ණ සතුටක් වෙන එක තමයි. මිෂනාරිවරයෙකුගේ රහස තමයි, “මම උන්වහන්සේට අයිතියි, උන්වහන්සේ මගේ තුළින් උන්වහන්සේගේ වැඩත් උන්වහන්සේගේ අරමුණුත් ඉටු කරනවා” කියලා ඇත්තටම කියන්න පුළුවන් වීමයි.

සම්පූර්ණයෙන්ම උන්වහන්සේට අයිති වෙන්න!

ගීතාවලිය 143-145; 1 කොරින්ති 14:21-40

ප්‍රඥාව – ඔස්වල්ඩ්

දෙවියන්වහන්සේ කෙරෙහි තියෙන ඇදහිල්ලේ ලොකුම දේ තමයි, කැලඹීම මැදත් මනුෂ්‍යයෙක්ව නොසැලී තියාගන්න පුළුවන් වීම. යෙසායා පිළිබඳ සටහන්, 1376