දෙවියන්වහන්සේ යේසුස් ක්‍රිස්තුස්වහන්සේව කැඳවූයේ පෙනෙන විදිහට මුළුමනින්ම විනාශකාරී තැනකටයි. ඒ වගේම යේසුස් ක්‍රිස්තුස්වහන්සේ උන්වහන්සේගේ ගෝලයන්ටත් උන්වහන්සේ මරණයට පත්වෙන හැටි බලන්න කියලා කැඳවූවා. උන්වහන්සේ ඔවුන්ව රැගෙන ගියේ ඔවුන්ගේ හදවත් බිඳී යන තැනකටයි. මනුෂ්‍ය දෘෂ්ටියෙන් බලද්දී උන්වහන්සේගේ ජීවිතය මුළුමනින්ම අසාර්ථක එකක් වගේ පෙනුණා. නමුත් මනුෂ්‍යයන්ට අසාර්ථකත්වයක් වගේ පෙනුණු දේ, දෙවියන්වහන්සේගේ දෘෂ්ටියෙන් බලද්දී ජයග්‍රහණයක් වුණා. මොකද දෙවියන්වහන්සේගේ අරමුණ කිසිවිටෙකත් මනුෂ්‍යයන්ගේ අරමුණ වගේ නෙමෙයි.

දෙවියන්වහන්සේගේ මේ වටහාගන්න අමාරු කැඳවීම අපේ ජීවිතවලටත් එනවා. දෙවියන්වහන්සේගේ කැඳවීම බාහිරව සම්පූර්ණයෙන්ම පැහැදිලි කරන්නවත්, හරියටම තේරුම් ගන්නවත් බැහැ. ඒක අපේ ඇත්ත අභ්‍යන්තර ස්වභාවයෙන් විතරක් දැනෙන, වටහාගන්න පුළුවන් කැඳවීමක්. දෙවියන්වහන්සේගේ කැඳවීම මුහුදේ හඬ වගේ නේ; තමන් තුළ මුහුදේ ස්වභාවය තියෙන කෙනාට විතරයි ඒක ඇහෙන්නේ. දෙවියන්වහන්සේ අපව කැඳවන්නේ මොකටද කියලා හරියටම කියන්න බැහැ. මොකද උන්වහන්සේගේ කැඳවීම කියන්නේ උන්වහන්සේගේ අරමුණු ඉටු කරගන්න උන්වහන්සේගේ මිතුරෙක් වගේ ඉන්න එකමයි. අපේ ඇත්ත පරීක්ෂණය තියෙන්නේ දෙවියන්වහන්සේට ඕනේ දේ උන්වහන්සේම දන්නවා කියලා ඇත්තටම විශ්වාස කරන එකේ. සිද්ධ වෙන දේවල් අහම්බෙන් සිද්ධ වෙන්නේ නැහැ. ඒවා මුළුමනින්ම දෙවියන්වහන්සේගේ නියමයෙන්ම සිද්ධ වෙනවා. දෙවියන්වහන්සේ තමන්ගේම අරමුණු ඉටු කරගෙන යනවා.

අපි දෙවියන්වහන්සේ සමඟ සහභාගිකමෙන් සහ එකමුතුකමෙන් ඉන්නවා නම්, උන්වහන්සේ අපව උන්වහන්සේගේ අරමුණු කරා ගෙන යන බව හඳුනාගන්නවා නම්, උන්වහන්සේගේ අරමුණු මොනවාද කියලා හොයන්න අපිට තවදුරටත් වෙහෙසෙන්න ඕනේ නැහැ. අපි ක්‍රිස්තියානි ජීවිතයේ වර්ධනය වෙද්දී, ඒක අපිට තවත් සරල වෙනවා. මොකද “දෙවියන්වහන්සේ මේක හරි අරක හරි සිද්ධ වෙන්න ඉඩ දුන්නේ ඇයි?” කියලා අහන්න අපි තවත් අඩුවෙන් පෙළඹෙනවා. ජීවිතයේ සිද්ධ වෙන හැම දෙයක් පිටිපස්සෙම දෙවියන්වහන්සේගේ බලවත් අරමුණ තියෙනවා කියලාත්, ඒ අරමුණ සමඟ එකතුවෙන්න දෙවියන්වහන්සේ අපව දේව කැමැත්තෙන් හැඩගස්වනවා කියලාත් අපි තේරුම් ගන්න පටන් ගන්නවා. කිතුනුවෙක් කියන්නේ තමන්ගේ හැකියාවන් මත නෙමෙයි, දෙවියන්වහන්සේගේ දැනුම සහ ප්‍රඥාව මත විශ්වාසය තබන කෙනෙක්. අපිටම කියලා අරමුණක් තියෙනවා නම්, ඒක දෙවියන්වහන්සේගේ දරුවන්ට තිබිය යුතු සරලකම, සමාදානය සහ සැහැල්ලු ගමන නැති කරනවා.

ගීතාවලිය 68-69; රෝම 8:1-21

ඔස්වල්ඩ්ගෙන් ප්‍රඥාව

ආබ්‍රහම්ගේ ජීවිතය කරුණු දෙකකට කදිම උදාහරණයක්: දෙවියන්වහන්සේට කිසිම කොන්දේසියක් නැතුව යටත් වෙන එක සහ උන්වහන්සේගේ උත්තරීතර අරමුණ වෙනුවෙන් උන්වහන්සේගේ දරුවෙක්ව සම්පූර්ණයෙන්ම තමන් සතු කරගන්න එක.
නොදන්නා ගමනකට පිටත් වීම

—