යේසුස් ක්‍රිස්තුස්වහන්සේ එක්ක තියෙන ඔබේ ජීවිතය පළුදු කරන්න පටන්ගන්න ඕනෑම දෙයක් ආවොත්, ඒ වෙලාවෙම උන්වහන්සේ වෙතට හැරෙන්න. ඔබේ සහනය නැවත ඇති කරන්න කියලා උන්වහන්සේගෙන් ඉල්ලන්න. ඔබේ ජීවිතේ නොසන්සුන්කමක් ඇති කරන කිසිම දෙයක් ජීවිතේ ඇතුළේ රැඳිලා තියෙන්න ඉඩ දෙන්න එපා. ඒ බිඳවැටීමට හේතුවෙන හැම පුංචි දෙයක්ම, ඔබ ඉඩ දිය යුතු දෙයක් විදිහට නෙමෙයි, සටන් කළ යුතු දෙයක් විදිහට හිතන්න. ඔබ තුළ උන්වහන්සේ ගැන දැනීමක් ඇති කරන්න කියලා ස්වාමීන්වහන්සේගෙන් ඉල්ලන්න. එතකොට තමන් ගැනම තියෙන අවධානය නැති වෙලා යයි. එවිට උන්වහන්සේ ඔබට හැමදේම වෙනවා. තමන් ගැනම තියෙන අවධානය දිගටම පවත්වාගෙන යන්න එපා, මොකද හෙමින් සැරේ ඒක තමන් ගැනම අනුකම්පාවක් ඇති කරනවා. ඒ වගේම ඒ තමන් ගැනම අනුකම්පාව කියන්නේ සාතනික දෙයක්. “හොඳයි, ඒ අය මාව වැරදියට තේරුම් අරන්. ඒකෙන් මට සමාව ඉල්ලන්න ඕනේ ඒ අය තමයි. මම මේක ඒ අයත් එක්ක කලින්ම පැහැදිලි කරගන්න ඕනේ” කියලා ඔබටම කියාගන්න ඉඩ දෙන්න එපා. මේ ගැන අනිත් අයව අතහැරලා ඉන්න ඉගෙනගන්න. ක්‍රිස්තුස්වහන්සේ කෙරෙහි අවධානය ඇති කරලා දෙන්න කියලා සරලවම ස්වාමීන්වහන්සේගෙන් ඉල්ලන්න. උන්වහන්සේ තුළ ඔබේ සම්පූර්ණත්වය පූර්ණයෙන්ම ස්ථිර වන තුරු උන්වහන්සේ ඔබව ස්ථිරව තබයි.

පරිපූර්ණ ජීවිතයක් කියන්නේ දරුවෙකුගේ ජීවිතය. ක්‍රිස්තුස්වහන්සේ ගැන මම සම්පූර්ණයෙන්ම අවධානයෙන් ඉන්නවා කියලා දැනෙද්දී, එතැන මොකක් හරි වැරදියි. සෞඛ්‍යය කියන්නේ මොකක්ද කියලා ඇත්තටම දන්නේ ලෙඩ කෙනා තමයි. දෙවියන්වහන්සේගේ දරුවෙක්ට දෙවියන්වහන්සේගේ කැමැත්ත ගැන වෙනමම අවධානයක් නැහැ, මොකද ඔහුම දෙවියන්වහන්සේගේ කැමැත්ත වෙනවා. අපි දෙවියන්වහන්සේගේ කැමැත්තෙන් පොඩ්ඩක් හරි වෙනස් වුණාම, “ස්වාමීනි, ඔබවහන්සේගේ කැමැත්ත මොකක්ද?” කියලා අහන්න පටන්ගන්නවා. දෙවියන්වහන්සේ යාච්ඤාවලට උත්තර දෙනවා කියන දේ තමන්ට දැනෙන්න සලස්වන්න කියලා දෙවියන්වහන්සේගේ දරුවෙක් කවදාවත් යාච්ඤා කරන්නේ නෑ, මොකද දෙවියන්වහන්සේ හැමවිටම යාච්ඤාවලට උත්තර දෙන බව ඔහුට නිතරම සන්සුන්ව විශ්වාසයි.

අපේම සාමාන්‍ය ක්‍රමවලින් තමන් ගැනම තියෙන මේ අවධානය නැති කරන්න හදනවා නම්, ඒකෙන් වෙන්නේ ඒක තවත් ඉතාමත් වැඩි කරන එක විතරයි. යේසුස්වහන්සේ කියන්නේ, “මා වෙතට එන්න… මම ඔබට සුවය දෙනවා” කියලයි. ඒ කියන්නේ තමන් ගැන හිතන එක වෙනුවට ක්‍රිස්තුස්වහන්සේ කෙරෙහි තියෙන අවධානය ඒ තැන ගන්නවා. යේසුස්වහන්සේ එන ඕනෑම තැනක උන්වහන්සේ සන්සුන්කම ඇති කරනවා. ඒක අපේ ජීවිතේ ක්‍රියාවන් සම්පූර්ණ වෙලා තියෙන නිසා ලැබෙන සන්සුන්කමක්. එතැනදී තමන් ගැනම දැනීමක් නැහැ.

ගීතාවලිය 105-106; 1 කොරින්ති 3

ඔස්වල්ඩ්ගෙන් ලැබෙන ප්‍රඥාව

ඔබ සතුටෙන් ඉන්න වෙලාවට සතුටෙන් ඉන්න; දුකෙන් ඉන්න වෙලාවට දුකෙන් ඉන්න. දෙවියන්වහන්සේ ඔබට මිහිරි කුසලානක් දීලා තියෙනවා නම්, ඒක තිත්ත කරගන්න එපා. උන්වහන්සේ ඔබට තිත්ත කුසලානක් දීලා තියෙනවා නම්, ඒක මිහිරි කරන්න හදන්නත් එපා. දේවල් එන විදිහටම පිළිගන්න. උන්වහන්සේගේ හස්තයේ සෙවණ, 1226 L