දෙවියන්වහන්සේගේ පුත්‍රයාණන් යාච්ඤා කරන විට, උන්වහන්සේගේ මුළු අවධානයම සහ සිහිය තිබෙන්නේ උන්වහන්සේගේ පියාණන්වහන්සේ කෙරෙහි පමණයි. දෙවියන්වහන්සේ සෑම විටම උන්වහන්සේගේ පුත්‍රයාණන්ගේ යාච්ඤාවලට ඇහුම්කන් දෙනවා. එබැවින් දෙවියන්වහන්සේගේ පුත්‍රයාණන් මා තුළ හැඩගැසී ඇත්නම් (ගලාති 4:19 බලන්න), පියාණන්වහන්සේ මගේ යාච්ඤාවලටත් සෑම විටම ඇහුම්කන් දෙනවා. නමුත් දෙවියන්වහන්සේගේ පුත්‍රයාණන් මගේ මාංශය තුළ ප්‍රකාශ වෙන්න මම වගබලා ගත යුතුයි. “…ඔබේ ශරීරය ශුද්ධාත්මයාණන්ගේ මාලිගාවයි…” (1 කොරින්ති 6:19), එනම් ඔබේ ශරීරය දෙවියන්වහන්සේගේ පුත්‍රයාණන්ගේ බෙත්ලෙහෙමයි. දෙවියන්වහන්සේගේ පුත්‍රයාණන්ට මා තුළ ක්‍රියා කරන්න අවස්ථාව ලැබිලා තියෙනවද? උන්වහන්සේගේ ජීවිතයේ තිබුණු ඒ සරල බවම, උන්වහන්සේ මෙහි පොළොව මත ජීවත් වෙද්දී වගේම, මා තුළත් ක්‍රියාත්මක වෙනවද? සාමාන්‍ය මනුෂ්‍යයෙක් විදිහට දෛනික ජීවිතයේ සිදුවීම්වලට මම මුහුණ දෙනකොට, දෙවියන්වහන්සේගේ සදාකාලික පුත්‍රයාණන් උන්වහන්සේගේ පියාණන්වහන්සේට කළ යාච්ඤාව මගේ තුළත් යාච්ඤා වෙනවද? යේසුස්වහන්සේ මෙහෙම කියනවා, “ඒ දවසේදී ඔබ මගේ නාමයෙන් ඉල්ලන්නහුය…” (යොහන් 16:26). උන්වහන්සේ කතා කරන්නේ මොන දවස ගැනද? ශුද්ධාත්මයාණන්වහන්සේ මා වෙත පැමිණ, මා මගේ ස්වාමීන්වහන්සේ සමඟ එක කරන දවස ගැනයි උන්වහන්සේ කියන්නේ.

ස්වාමීන්වහන්සේ වන යේසුස් ක්‍රිස්තුස්වහන්සේ ඔබේ ජීවිතයෙන් බහුල ලෙස තෘප්තිමත් වෙනවද, නැත්නම් ඔබ උන්වහන්සේ ඉදිරියේ ආත්මික උඩඟුකමකින් ඇවිදිනවද? ඔබේ සාමාන්‍ය බුද්ධිය කොච්චර ප්‍රබල වුණත්, ඒකෙන් දෙවියන්වහන්සේගේ පුත්‍රයාණන්ව පසෙකට තල්ලු වෙන්න කිසිවිටෙක ඉඩ දෙන්න එපා. සාමාන්‍ය බුද්ධිය කියන්නේ දෙවියන්වහන්සේ අපේ මනුෂ්‍ය ස්වභාවයට දීපු තෑග්ගක්. හැබැයි ඒක උන්වහන්සේගේ පුත්‍රයාණන්ගේ තෑග්ග නෙමෙයි. අද්භූත අර්ථයෙන් දේවල් වටහා ගන්න හැකියාව තමයි උන්වහන්සේගේ පුත්‍රයාණන්ගේ තෑග්ග. ඒ නිසා කවදාවත් අපේ සාමාන්‍ය බුද්ධිය සිංහාසනයේ තියාගන්න එපා. පුත්‍රයාණන් හැමවිටම පියාණන්වහන්සේව හඳුනාගෙන උන්වහන්සේ සමඟ එකඟ වෙනවා. හැබැයි සාමාන්‍ය බුද්ධිය එහෙම කරලා නැහැ, ඉදිරියෙත් කරන්නේ නැහැ. අපේ සාමාන්‍ය හැකියාවන්ගෙන් දෙවියන්වහන්සේට නමස්කාර කරන්න බැහැ, ඇතුළාන්තයෙන් වාසය කරන දෙවියන්වහන්සේගේ පුත්‍රයාණන් අපව වෙනස් කළොත් පමණයි එහෙම කරන්න පුළුවන්. අපේ මාංශය උන්වහන්සේට සම්පූර්ණයෙන් යටත් කරලා තියාගෙන, මොහොතින් මොහොත උන්වහන්සේට ඒක තුළින් වැඩ කරන්න ඉඩ දෙන එක අපි වගබලා ගත යුතුයි. යේසුස් ක්‍රිස්තුස්වහන්සේ මත අපි කොච්චර රඳා ඉන්නවද කියලා බලන්න ඕනේ. එහෙම රඳා ඉඳගෙන, උන්වහන්සේගේ ජීවිතය මොහොතින් මොහොත අප තුළ ප්‍රකාශ වෙන්න ඉඩ දෙන තරම් අපි ජීවත් වෙනවද?

ගීතාවලිය 77-78; රෝම 10

ඔස්වල්ඩ්ගෙන් ප්‍රඥාව

ඔබේ දෘෂ්ටිය පුළුල් කරන, සහ මානසිකව ඔබව දිගු කරන්න පුළුවන් කරවන පොත්පත් හා මිනිසුන් සමඟ නිතරම සම්බන්ධව ඉන්න. ජීවිතයේ සදාචාරාත්මක පදනම, 721 R